八方一向好佩服無國界醫生，事關醫生做義工的機會成本，即係要放棄豐厚入息，而且要冒生命危險去戰地，真係好偉大。昨日無國界醫生國際主席Rostrup醫生在港大與聯合國難民公署香港總監，及去過阿富汗的有線政治記者蔡淑儀合辦講座「麵包與炸彈」，八方當然唔會錯過，聽Rostrup醫生講，原來呢個組織喺七十年代由一班醫生同記者始創，八方都覺得與有榮焉。
不過剛從阿富汗坎大哈回來的Rostrup主席，就話俾一手空投炸彈、一手空降糧食的美軍害死。因為當地人當晒所有派糧食的外國人係敵人，Rostrup主席重形容有些美軍是「穿着羊皮的狼」，不穿軍服手持機槍。搞到當地人分唔清着醫生袍的無國界醫生同軍人，隨時成槍靶。雖然人哋分唔清，但無國界醫生就一視同仁，話就算見到拉登受傷都會第一時間施以援手，不過就絕不會涉及政治爭議，醫生只會救人，不會宣揚民主自由。
E-mail：