隔晚美股有景，但港股唔「領情」，輕微回落，收市後期指跌多啲，埋單計低水38點。成交縮到60億，經紀數手指，或者喺電盈（008）買盤方面搞嘢，一度買家排到千幾個，收市時副牌（即低1格）都排到983個，真係有咁多散戶落盤買貨？
杜指隔晚升138點，港市杜指認沽輪1717只係微退2格，收6.6仙，意味炒家預咗美股會又再回落。
中海油（883）好咗20仙，收7.80元。3隻中海油認購輪，全部威威，龍虎榜上排第1、2、4。
中海油近期上上落落，不妨細細注跟勢玩中海油輪，低買高賣。3隻輪中，正路對象係1759，現價12仙，溢價2.6%，槓桿率6.5倍，5月30日先至到期，成交算活躍，買賣唔難。
龍虎榜上有隻新興光學公司輪299，收31仙，升5.1%。
新興（125）業績唔錯，隻輪數據亦可接受，現價31仙，溢價3.4%，槓桿率4.7倍，有得諗，只不過成交太奀，難買賣。