哇！哇！哇！數字地球（109）又再供股，今次1供11，每股作價1.5仙，集資1.09億元。小初記憶所及，今次已經係自2000年以來第3次供股。對於呢種財技，小初真係甘拜下風，寫個服字。
數字地球噚日一度急跌4成至6仙，但收市抽回8.2仙，跌幅收窄至18%。唔知經紀陳係咪唔服氣，抑或係膽正命平，佢話自己喺低位撈咗唔少，覺得隻股有機會炒上，博幕後參與供股。
經紀陳用兩個角度去睇數字地球今次嘅供股計劃，首先由基本因素睇，理論上隻股每股資產淨值有成36仙，較供股價大折讓95.8%，所以供得過咁話。
其次以純炒作嘅角度睇，自從隻股喺去年初玩80合1大併股後，股價只係向下炒，所以估計貨源一早已歸邊，如果幕後炒家想舞上嘅話，絕對唔係難事，而且經紀陳亦相信，炒家都有人供股，因為要圍晒1億元唔係好容易。