早兩晚《蘋果》四位攝影同突發同事着到好靚，西裝打呔，八方初時以為佢哋去相睇，點知原來係去攞獎，攞外國記者協會頒發嘅五個攝影獎項。
其中由香港旅遊發展局贊助嘅「動感之都-就是香港！」攝影獎，《蘋果》攝記張家俊同王子俊都榮獲優異獎。張家俊嘅得獎作品出於銅鑼灣百德新街一幅巨型海報，海報女主角雙手掩胸，一個天真無邪嘅細路仔行過，抬頭望住呢位性感嘅姊姊。張家俊話，呢張相佢捕咗成半個鐘先影到，重難過追女仔。唔單止咁，佢亦喺港聞組別攞到一個優異獎㖭！
而王子俊嘅作品係端午龍舟競渡寫真，連健兒嘅面部表情同肌肉線條都影埋出嚟，「王子」話佢最鍾意動態拍攝，因為夠挑戰性喎。另一位攝記曾顯華同突發記者陳水忠則分別獲得港聞組亞軍同亞洲新聞組季軍，實在可喜可賀！
E-mail：