原中國銀行行長、前中國建設銀行行長王雪冰被撤職，內情不詳，銀行界知道嘅，就係中國銀行香港嘅一位高層返回內地之後，亦受審查，唔知道同王雪冰有冇關係。
好多時，某機構發生事故，唔止一個人會受牽連。例如美國安隆破產案，民主黨議員要追查白宮及布殊內閣閣員有冇徇私，點知傳媒一查，原來共和黨、民主黨喺二○○○年選舉時，齊齊接受安隆嘅捐款，發掘落去，兩黨都唔會威得去邊！
天下事無論古今中外，都涉及人與人嘅交情，安隆如此，中國人何嘗不然。據講王雪冰喺文革時候被批鬥，下放牛棚，與無數高級中級幹部落鄉，佢就辛苦好多，被下放到蒙古，昔有蘇武牧羊，後有王雪冰牧馬，千古同悲。喺冰天雪地，風沙撲面嘅環境中，王雪冰有一位知己，與佢一起分享苦寒，互相撐住。呢位老友姓梁名小庭，以後大家成為莫逆之交。
從蒙古牧馬到主持中國銀行，其中差別，真係天同地比。估唔到好景不常，竟然再跌落凡塵受調查，人生如朝露，來日無多，做人知足者常樂，大家宜謹記之。
高級賓架，威則威矣，實則仍然係高級打工仔，一世扶助他人發達，自己唔可以發達，想發達嘅叻仔叻女，千祈唔好一世都做商業賓架！