烤全羊係中國西北省名菜之一，主角乃新疆天山綿羊，一般稱為「新疆烤全羊」。西北省共有5個自治區，各有不同醃製及燒烤方法，閣下想品嘗既正宗且便宜嘅西北全羊宴，不妨往深圳福田區，剛開張一個月嘅「西北春」走一趟，絕對可令你大快朵頤！
記者：梁煒健 攝影：林栢鈞
ImageGirl：張望
全羊宴大解構
10種藥材慢火炮製
全羊宴嘅主角當然就係肥美兼嫩口嘅羊仔。西北人專挑三個月大嘅小綿羊，貪其羶味比山羊輕。小綿羊配以家鄉特製嘅調味料、洋葱及白蘿蔔等醃製3至4小時後，再用10種天山藥材如乾雪蓮、杞子及甘草等，以慢火烤熟，烤出嚟嘅羊肉既滋味又嫩口，絕無羶味。每日燒烤全羊隻數有限，想食就要預早Book！
除了烤全羊，全羊宴當然包括其他以羊肉炮製嘅美食啦！
全羊宴包括一隻3個月大嘅烤羊仔外，還包牛驢雙拼、卷餅羊米、蒜泥羊肉及陝西涼皮等菜式。全羊宴套餐可供6至8人享用，收費只需?388。若嫌唔夠喉，重可以參考以下散叫的價錢。
肉質爽口
呢個冷盤用上牛腿肉及驢腿肉，經過西北人特別醃製方法後切片上碟。雖然係冷盤，但肉質嘅鮮味仍然保持得唔錯，口感十分爽口。呢味冷盤乃全羊宴附送，散叫亦可。
以青椒及紅椒炒熟羊肉粒，再以薄麵粉皮包住嚟食嘅「卷餅羊米」，係西北省嘅特色食品之一，食法雖然與廣東人嘅「鵪鶉鬆」相若，但口感就截然不同。全羊宴已包埋呢款美食，亦可另外散叫。
伴羊肉至正
以麵粉、芝麻及葱搋埋一齊再燒烤而成嘅新疆饢餅，味道清淡，配合味道濃郁的羊肉食最正。香酥石子饃做法亦一樣，由於用上雨花石作燒烤工具，所以呈現凹凸紋，別致非常。歎全羊宴時，右方呢幾款小食就絕對唔少得。
惹味爽口
不少香港食客鍾情此道「陝西涼皮」菜式。涼皮一般做法，以麵粉在冷水中沖洗後，待乾身切成條狀，再以熱力將其蒸熟而成。拌以芝麻及陝西人常用嘅調味料，食落異常惹味兼爽口。
手抓羊肉最鮮味
可謂「手抓羊肉」？原來新疆人只會用手嚟食羊，不用筷子等工具，故有此名字。選用1至2個月大嘅綿羊仔以清燉方法烹調，不加調味料，味道非常鮮味，且熱辣辣夠嫩口，小記特別推介給大家試食。（注意：此碟菜式不包括於全羊宴內，想食就要散叫）。
西北春
地址：深圳市福田區中航路（南）八大幫食村（天虹商場後面）
電話：（86-755）3321073
營業時間：早上9:30至凌晨12:00
座位：約300
交通：從羅湖關口前往，乘的士車程約10分鐘，車費約?20。