港股呢個禮拜氣氛明顯差咗，但實際上全周只跌194點，跌幅1.7%。從技術走勢嚟睇，恒指先跌穿50日線，繼而萬一點關口失守，都屬不利訊號。不過由日線圖形態上嚟睇，如果呢個星期低位10808係短期底部，則恒指有機會以碗形回升，上試11300阻力。以上推測基於新嘅備兌證快將出籠，美股企業普遍業績較預期佳，以及月底美國再減多一次息。
其實趙飛雲對以上港股較樂觀嘅走勢推測並無太大信心，不過今個星期覺得香港社會嘅氣氛好「灰」，與其向壞處想，不如樂觀啲向好處諗。
呢個禮拜上到證券行覺得愈嚟愈冷清，唔單止客少，連經紀都唔見咗好多，唔知係咪走咗去開會準備大遊行？趙飛雲都唔明白聯交所班高層點諗，真正炒股票嘅人，點會斤斤計較佣金，佢哋最關心係做唔做到盤，及經紀要誠實可靠。取消最低佣金制，無疑打爛好多細經紀行飯碗，增加失業率。經濟不景，港股成交萎縮，細經紀行已經吊鹽水，取消埋最低佣金制，等於趕佢哋入絕路。雖然話汰弱留強係商場定律，但鋤弱扶強就十分唔文明。