盧希萊和丈夫豹哥投資超過五十萬和朋友夾份在元朗開車行。雖然兩夫婦知道現時經濟差做生意冒險，但為了女兒將來的幸福，決定博一博。
亞視前《今日睇真D》主持盧希萊（阿萊）上月誕下女兒陳佳言，阿萊和丈夫陳展鵬（豹哥）早前曾表示為了女兒，希望找一份收入較穩定的工作。不過本報收到消息，兩人最近在元朗開了一間車行，面積約四千呎，可以擺放約三十架車。
記者昨日致電阿萊，她說：「間車行係豹哥同朋友合資嘅，我哋今次投資做生意，主要都係為咗個女。其實兩年前我同亞視約滿之後，我就一直想返美國，因為屋企人喺嗰邊，但豹哥怕適應唔到嗰邊嘅生活，咁我當然支持佢啦！」
阿萊續說：「香港𠵱家市道咁差，搵工都未必可以搵到份理想嘅，所以我哋就諗將之前嘅積蓄攞出嚟做生意。豹哥向來好鍾意車，又同車行熟，以前都成日介紹朋友買車，所以咪諗到開車行咯。」
現時豹哥每日都在車行坐鎮。豹哥昨日在車行說：「呢度係我同朋友夾份投資，總共投資咗超過一百萬，我佔一半都要五十幾萬。𠵱家重籌備緊，月尾先正式開張，不過已經開始做緊生意，朋友要買車，唔通唔做咩！車行主要係買賣一手同二手車，另外會做埋汽車維修。我知𠵱家呢個市道做生意都幾冒險，不過為咗個女嘅幸福，都要博一博啦！」
採訪：張止寒 攝影：王光鴻