美股勁插水，港股竟反彈。恒指噚日又出現反走勢，杜指及納指前晚跌逾2%，但恒指先跌後升，重返萬一關之上，又似乎樂觀咗啲。
雖然前晚美股收市後，雅虎及康柏第4季業績較市場預期佳，而噚日外圍美股期指亦造好，啟示將有反彈，但左秤右秤都覺得港股冇理由倒升咁誇張，唔通真係新輪登場有咁大威力？總之一句，暫時遠離大藍籌。此外，散戶如果玩期指，要預咗俾大戶挾，要留多啲彈藥防守。
前日提過兩隻大行推介嘅股份上海石化（338）及Sunday（866），噚日果然繼續升，不過若見成交明顯縮減，就要睇位落車。
深圳國際（152）噚日平收0.315元，技術走勢暫時仍偏弱，未突破50日線0.325元前暫時睇吓先。不過若跌近0.29至0.30元範圍，則可博小注反彈。
深國揸咗3成深高速（548），因此深高速走勢亦對深國有影響。深高速近日喺1.85至1.90元窄幅整固，走勢亦係略為偏淡。不過呢兩隻股票中線睇好，不妨留意，趁低收集。