矮仔咪埋嚟花心快滾開
徐子淇五貼士揀情郎

現年十九歲的徐子淇，自幼生長在一個幸福的家庭，去年子淇遠赴英國倫敦讀大學，她日前返港時，卻有報道指子淇跟洪天明兩個月前已分手，主要是子淇的母親怕女兒捱窮，不太贊成二人交往。若徐子淇再度拍拖，男友需要具備甚麼條件呢？

1.可介意和圈中人拍拖，抑或會與外國人交往？
「我一定唔會介意朋友嘅背景，做得朋友就唔應該分等級同斤斤計較。至於我唯一要求係對方一定要係中國人，𠵱家我認識唔少不同地方長大嘅朋友，我發覺喺外國長大嘅男仔，佢哋比較純，而香港嘅男仔就醒目同精明。我唔會介意同圈中人一齊，但一切要隨緣。」

2.要求男友有豐厚的家財嗎？
「佢唔一定要有錢，好窮都唔緊要，我日日同佢食麵包，住好細間屋都得。只要大家開心就得，將來一齊捱都冇所謂。雖然我喺娛樂圈工作，但絕對唔會貪慕虛榮，我唔會貪人哋啲禮物畀我，每次朋友送禮物，我都一定會送番禮物或者請番人哋食飯，呢啲係禮貌，媽咪自細教我嘅。」

3.害怕男友是個「花心蘿蔔」？
「我覺得揀男友，樣靚其次，人品最重要，只要心地好，一定會愈睇愈靚，因為我要對佢一世。將來嘅男友要對我好專一，同埋佢一定唔可以矮過我，咁樣大家一齊先合襯。」

5.可會要求男友跟家人相處愉快？
「要㗎，將來我拍拖，最先一定會同妹妹講，因為我一向同妹妹最好感情，有乜嘢秘密都會分享，然後先慢慢講畀爹哋同媽咪知。始終家人係我喺世界上最信任嘅人，男友都未入流，除非將來我同嗰個男人結婚，我當埋佢係家人一分子，我先會信晒佢，我覺得女仔應該識得保護自己。」

6.是否要求男友跟自己一樣有良好學歷？
「唔一定，我認為另一半最好要有上進心、勤力，咁樣對我哋將來嘅生活會好啲，總之，我最憎係男人懶。我當然好想男友叻過我，咁我將來有乜嘢唔識，佢都可以教到我。」
採訪：比華利
攝影：陳志嵐
服裝：3-concept
皮靴：Joy&Peace
化妝：SynniTam(YMCK)
髮型：Edmond(TeteHairDressing)