平時家居一腳踢，見到職工盟有個歲晚大掃除互助計劃，年廿八未到，便已經心思思想洗邋遢的我，正好合用。三個家務助理都是斯文師奶，同班培訓有照應，相當好姐妹。
但這班好姐妹遇着我這個大懶蟲煮婦，認真唔好彩。望落企企理理的廚房，其實已經兩年沒打理，姐妹用百潔布一拭，直喊阿彌陀佛。未幾，抹浴室那位家務勇士，哎喲慘叫，在廚房苦幹那位，死命用小鏟子驅逐磁磚上頑固如官僚的油迹，沒法騰空向廁所受難的姐妹伸出援手。我只好大叫，OK啦，鏟唔甩就冇理佢，繼續往前線殺將過去就是了。清理陽台的姐妹正好換水，向我稟告，桶水是黑色的，已經換過三桶啦。簡直就像向主帥報告，又被敵方斬了三連武將的人頭。那桶污水，又確係比人頭更觸目驚心。我只好合十退下，假裝在書桌用功，其實是在念經，希望她們不會事後唱衰我。「真係睇唔出咁大塵。」臨別時三人異口同聲說。我脖子通紅唯唯諾諾。
除垢掃塵是手板眼見工夫，家務勇士應付裕如。但心靈塵垢一定要自己動手勤揩拂。至於積累在每個家庭旮旯的感情塵垢，外人未必看到，於是大條道理縮骨，疏於清理；假使兩個人都抵得，倒相安無事。只是，塵垢始終無益，感情蒙塵，更窒礙雙方的對流管道，容易拗頸，互相頂撞對方的肺！趁這個辛巳蛇年尾，各位弟兄姊妹，夾手夾腳捅破封塵的感情網，向蜘蛛蠄蟧下逐客令；這樣，或許你會重新發現另一半的可愛真性情。咦，老友，你老婆唔係組合櫃，噴佢碧麗珠做乜？