日前於BrusselsMotorShow2002嘅會場上，平治車廠公布咗新E-Class嘅詳細資料，並宣布於今年3月中喺歐洲多個地區正式推出。
從相片中可以睇到，新E-Class嘅造型可謂十分吸引，除仍沿用「四眼仔」嘅設計外，買家更可選擇配用Halogen或Xenon頭燈配搭，以迎合不同需要，而車尾則採用類似S-Class嘅三角形尾燈設計，從而可給予尾隨駕駛者有更明確嘅提示。然而，新車除車廂空間寬敞外，內裏更備有不少豪華裝備，除卻真皮座椅及桃木裝飾外，廠方更為新E-Class配備有Thermotronic恒溫冷氣、高級音響配備等等，全都令享受程度進一步提升；而用家更可為新E-Class配備有KeylessGo系統及多功能聲控系統（Linguatronic），從而讓駕駛者喺駕駛時可更集中精神及帶來不少方便。
新車備有多台引擎供用家選擇，當中廣受本港車迷歡迎嘅E240，將會起用一台2597ccV6偈，馬力輸出達177匹，而扭力輸出則為24.5kgm/4500rpm，配合一套5前速自動波箱，從而令新車可有更出色嘅行車表現。據聞代理快者可於4月將之引入，各位車迷不妨拭目以待喇。