這檔位於柴灣環翠邨街市的大牌檔，一到夜晚人氣鼎盛，十多二十圍枱話咁快坐滿人。開檔十三年，做足兩代的「三家粉麵飯」之所以愈做愈旺，全靠老闆將菜式不斷推陳出新，無人食就無得留低要OUT出局，多人食就繼續賣，其中留得最長嘅黃金蝦就依然係熱賣榜首，難怪幫襯十幾年嘅街坊熟客都一致話食極唔厭！ 記者：黃婉冰
攝影：黃子偉
新鮮海中蝦蘸滿一身蛋白、麵粉，炸香加入金黃鹹蛋黃炒勻，鹹香不在話下，鮮脆海蝦肉甜殼軟，炸過後脆卜卜可以連殼食，不油不膩。
試味報告
黃金蝦夠大隻肉地厚，鹹香味恰到好處，蝦味不至被遮蓋。
大牌檔較少見的懷舊菜式脆炸小棠菜，脆漿下是打至起膠的墨魚肉包着小棠菜，脆漿一夾即散，未食都知外層夠鬆化。
試味報告
外層鬆化唔會成口粉，油淋淋爽滑墨魚肉同爽脆菜葉雙重咬感。
用自家打製的墨魚肉包住芝士粒，蘸上麵包糠炸熟，熱力將芝士溶化，令花枝丸入口有濃香芝士味，口感與味道不再單調。
試味報告
一啖過食有香濃芝士味花枝丸，炸得乾爽咬落唔會成口油。
由燜豬手改良而成的炸豬手，同樣會先以南乳汁燜到入味腍滑，食時再落鑊炸，大廚話口感外爽內滑，夾住炸過的蒜茸一齊食會更香口，配埋個南乳汁，味道濃定淡自己話事。
試味報告
少了濃稠的南乳汁，豬手咬落無咁漿口同膩，口感味道煥然一新。
將筋肉均勻的坑腩及集多種調味料的清湯，一煲過熬上兩個鐘，湯味同肉味二合為一，加上香芹、蒜子、蘿蔔等配料，鑊仔上，清香味四溢。
試味報告
啖湯最正，牛腩精華所在，食完牛腩記得飲埋佢。
泰國餐館食條明爐烏魚慳慳哋要過一百蚊，呢度就一百蚊唔使。汁料由師傅改良過，主要有香茅、青檸檬、梅子，味道與傳統泰式有些少唔同，為確保新鮮，每晚數量有限，唔會多過十條。
試味報告
魚汁滾起有清香香茅檸檬味，邊滾邊食最好慢慢歎。
店名：三家粉麵飯
電話：28973908
座位：150個
地址：柴灣環翠邨街市4號檔(地鐵站A出口)
營業時間：上午11時至下午2時,下午5時45分至凌晨1時
付款方法：只收現金 備註：不設加一收費