梅艷芳近來有新男友中泰混血兒ShumShum，感情有着落，正常嚟講應該定落嚟，不過事實就啱啱相反，呢排阿梅反而蒲吧蒲得更密，早排俾記者撞到佢半夜喺跑馬地飲到貓晒，大吵大鬧之餘，重衝出馬路，最後要出動佢嘅前度男友林國斌護花。
前晚阿梅又去咗跑馬地Alabar飲酒，佢今次冇蒲天光，凌晨十二點幾就走，不過離開嗰陣，佢已經飲到醉醺醺，要佢個女性朋友扶佢上車。
其實飲酒係開心嘅事，但好似阿梅咁飲過龍就好傷身，而且醉咗俾人影到失儀就更加唔好，希望阿梅明白啦！
鬼妹仔廖碧兒完全唔識中文，所以佢拍電視劇《皆大歡喜》就拍得好辛苦，每日都要佢阿爸幫佢喺劇本嘅中文字隔籬拼英文諧音，而且有好多廣東話佢根本唔明，就算讀到個音佢都唔明點解，成日要導演喺現場向佢解釋一次。廖碧兒今次係第一次拍劇，佢其實都好醒目，馮仁昭相信佢好快可以適應拍劇嘅生活。
最近有幾位紅星都怕咗某電影公司，認為嗰間公司由老闆至旗下藝人啲是非都特別多，怕同呢間公司合作嗰陣會有好多是非，所以有啲好錫身嘅紅星都避之則吉。聽講之前佢哋都搵過劉德華、鄭秀文、周潤發同周星馳拍戲，但最近都好似冇乜下文。所以話一間公司嘅形象好緊要，太多負面嘢就唔係咁好啦！
陳輝陽喺最近啲音樂頒獎禮可謂威到盡，攞咗唔少獎，𠵱家唔少歌星爭住搵佢做碟，之不過陳輝陽其實最想做唱片公司高層，因為佢對樂壇實在有太多嘢睇唔過眼。雖然佢對樂壇係有一份使命感，認為做咗唱片公司高層就可以有權力去改變一些歪風，馮仁昭亦好欣賞佢有咁嘅心，但一個人之力始終有限。
即將開告別演唱會嘅黎瑞恩，前幾日俾人影到佢去Gucci買衫，專揀紅色衫買，埋單十幾萬！馮仁昭問小恩子做乜買衫買到咁豪，佢即刻話要澄清。佢轉行做保險之後，知道搵食艱難，所以已經冇十幾萬咁掃貨好耐。佢話嗰日只係買咗八千幾蚊衫，絕對好慳儉。至於揀親都係紅色衫，係因為有相士同佢講過紅色好利佢，所以佢𠵱家上班服好多都係紅色。
劉家良早排因老婆翁靜晶個律師行上司林競業墮樓死咗，對佢兩公婆都造成好大困擾。呢輪劉師傅心情平復咗，佢部《洪拳》都搞得七七八八，邵氏準備畀三千萬佢開呢部戲，對佢都幾睇重。呢輪佢成日都入咗去邵氏同黃家禧、方逸華開會，今次劉師傅希望部戲嘅武術設計場面可以搞啲新意思。
香港電影金像獎頒獎禮又開始籌備，自從張同祖做咗金像獎董事局主席後，佢都好勞心勞力周圍搵人贊助經費，不過今年經濟唔好，搵經費都幾困難。喺今屆頒獎禮會增加多一個「亞洲電影大獎」，到時會選出五部最佳外語片出嚟，作為表揚，去年有咁多韓片、日本片、台灣片、內地片喺香港上映，好片表揚吓都啱嘅。