想當年電視遊戲節目，壓軸大獎最興送大陸樓，係人都知大陸樓夠平，成本輕，今時今日，香港樓價跌咗咁多年，唔少政界同地產業內人士都話，深港兩地樓價差距細咗。
對電視台嚟講，送層本地樓負擔都有限。噚日就聽到無綫個新遊戲節目，準備送出將軍澳清水灣半島2期600零呎單位一個。嘩，平極都要200幾萬啩，都咪話唔小嘢！
玩遊戲可以贏番層樓，打工仔就可以唔使為個窩捱得咁辛苦。講真，做邊行都有苦自己知，好似我哋做地產記者咁，睇地盤上現樓，就趟趟新鮮趟趟辛。
好似噚日有個九龍新盤搞地盤秀，上樓睇風景，但部𨋢又未能去到嗰一層，結果大家就要行成十層樓先至上到去。要知大家平日對住部電腦打稿就打得多，運動機會極少，行完一轉，十個行家九個索晒氣咯。
蘭西