報紙報道話安隆（Enron）破產案受調查，安達信涉嫌銷毀咗一啲文件與會計資料，令整件事疑雲陣陣，都唔知會唔會內中藏有驚天大陰謀。克林頓上任不久，便因白水案而俾特別檢控官（SpecialProsecutor）追查，搞到一身蟻，估唔到喬治布殊上台一年，又涉及世紀破產案。
銷毀文件，在美國係一件可大可小嘅罪案。據講某金融機構在紐約被罰巨款，起因就係有人在屋內用鐵罐燒文件，好似香港人在街邊燒衣紙咁款。呢位老友大概唔識美國一啲屋內裝置咗煙霧偵察器，當文件愈燒愈勁，警鐘響起，引來消防車救火，消防人員到場發覺有人燒文件，於是報警。咁就變成火燒連環船，卒之爆晒煲矣。大案件之穿崩，起因如此，可憐亦復可笑。
由呢件事想起內地機構在港招聘專才，話明要具備國際經驗，派駐外地接生意，呢間電子廠確係諗通咗，搵本港人士駐外，勝過搵皇親國戚駐外多多聲。投資S以前曾經喺某大中資機構嘅屬下電子大廠做高層管理，呢間廠派去三藩市辦事處做代表嘅，就係董事長個女，英文唔多識，成日在唐人街出入，生意接唔到，投資S去到三藩市，佢只係識得喺屋企煮飯請投資S食，投資S為之啼笑皆非！
現在內地機構進步好多，識得求才去求財，可喜可賀，香港人出到外邊，起碼識得點樣同外人打交道吖嘛！