早排小初提過嘅宏通集團（931），因有大行推介，股價一度高見84仙，但隨即回落，但就跌唔穿70仙水平。
經紀黃話隻股有得諗，因今次真係有芬佬留意。宏通噚日升6.9%，收78仙，成交金額唔夠1000萬元。
經紀黃話，宏通早排受熱錢追捧，一來係因為有大行出報告推介，二來係有個供應商花咗成千萬銀喺市場買貨。由於突然間有買盤推高股價，引來唔少炒家入場，點知收尾發覺原來人哋唔係買得好多，又冇消息跟尾，所以股價先至出現回吐。
經紀黃又話，原來幫宏通出報告嘅證券行，最近幫埋間公司搞咗個路演，據講反應唔錯，引起芬佬注意，所以隻股可以再睇多一次，但就唔好太心急，因呢隻唔係莊家股，唔好諗住佢一日升幾十個巴仙。
另外，天鷹電腦（1129）噚日上市，三扒兩撥就收齊街貨炒上，收74仙，較招股價高出48%。失敬！失敬！