冇見波鞋街Sales訴苦Sam一排，手上已換上「森孖雲拿」潛水名表一隻，莫非聖誕新年生意爆棚？訴苦Sam話總算過得去，比起其他零售行業，波鞋街今年總算唔錯，淨係靠賣行貨已搵到啖食。
訴苦Sam話除咗佢哋做咗咁多年門口生意嘅舖頭仍可捱得住外，就算年資較淺做Trade貨嗰班今年一樣搵到食，好似最出名做駁腳嘅高L，上兩個禮拜喺波鞋街大手掃關刀，行內傳佢一手過掃走超過一百對泥黃色AirForce1，每對出價$630，比起公價$549重要加15個巴仙，認真大手筆。過往波鞋街有人肯成批貨食，照慣例定有折頭，今次冇折不特止反而要加價，都算淡巿奇迹。
除咗高L外，原來連最出名賣水貨嘅「美國城巿」都出面掃貨，又係一口氣掃過百貨，所以對AirForce1先水漲船高，唔好誤會高L有錢冇碇使，無端端畀多幾十蚊人哋賺呀。估計批貨都係Trade去美國及留番小量香港高價賣。
訴苦Sam預計02年波鞋街整體氣氛比往年好，唔使好愁。但大食Jack提醒，老人家教落做人要居安思危，好多搵到唔少嘅老友某日返工突然被裁，失去高薪厚職，都唔知做乜好？相比下高L或訴苦Sam都總算有專長喇。
主持人：大食Jack
八卦熱線：