港股近日由11900水平跌至10800附近，調整幅度逾1000點。Cookie話噚日大戶開始平淡倉，所以港股跌到10800就跌唔落，大戶似乎想睇一睇下周發輪熱潮所引發嘅力量如何，後市相信會比較波動，唔會咁易出現單邊市，因此美股周三晚雖跌，港股噚日都可以反彈49點，收報11013點。不過香港失業率升至6.1%，可能過多兩三個月會升破6.3%，令到阿虎充滿危機感，未來啲樓市都唔知點睇好。
噚日任總講咗一番話，其中提及美國今次就算復甦都可能係短期反彈，難如以往出現10年長期增長，實在令阿虎心驚。
衝浪平台（8178）噚日終於回軟，股價下跌14.4%，收報1.19元，成交重有9192萬元，睇嚟似散貨格局，而文化傳信（343）亦下挫3.9%，收報0.49元。
不過，黑客話呢兩隻股份唔會只係炒一轉就算，若調整到咁上下，再見到成交又開始上升，而閣下又自問跳車技術了得，就不妨入市搭吓順風車。
星光生物科技（1051）黃金富噚日講到明公司有資金壓力，正計劃配股畀策略性投資者。不過聽聞冇咩人吼佢隻殼，所以股價近期持續下跌，噚日跌8.9%，收0.103元。
科達（673）上午已遭拋售，下午更傳出有人被斬倉，公司見勢色唔對，即刻將股份交易叫停，停牌前挫30.7%，收0.052元。公司話會有重大交易公布。e莉莎話公司似有意透過配股收購，希望起到護價作用。