飛哥嫁女，盛况空前；君悅禮堂上，往來無白丁。到賀嘉賓有李嘉誠、何鴻燊、鍾士元、劉皇發、蔣震、吳光正、陳祖澤、李國能、曾蔭培、楊啓彥、李國章、吳家瑋、潘宗光……數到口乾都數唔晒。
最搶鏡係陳太，鮮紅連身裙加喱士披肩，招牌四萬笑容，差啲以為佢辦喜事；李嘉誠六點半就到，逗留咗十分鐘；賭王就話自己啱啱在珠海開完人大政協會議趕嚟。
飛哥昨日好開心，又好自豪，話女兒（李嘉琪）一手安排自己的婚禮，因為她在貿發局幫施祖祥打工，做慣推廣活動。他對兩個兒子看來也很引以為榮，一有機會就主動介紹兩個專程由美國回來飲宴的乖仔畀人識，重爆埋他們身邊的靚女就是他們的女友。
講到兩個仔會否從政，飛哥決絕地說:「他們絕對冇興趣！」唔從政，飛哥兩位公子對邊瓣有興趣呢？原來二仔李嘉明投身財經界，三仔李嘉暉在美國做建築師。兒子不從政，不過飛哥看來對政治仍念念不忘，重話自己政治觸覺好，唔會於阿董參選的敏感期請佢去飲。
飛哥會點介紹自己的新女婿？佢話，Thomas「姓韋，韋小寶的韋。」將新女婿同金庸筆下生性風流，有七個老婆的韋小寶相提並論，唔知愛女會否抗議？
飛哥跟住又話，新郎名「敬慈」，可能因為對方是家中獨子，雙親希望兒子孝敬父母，所以改了這個名。據知新郎是沙田區議會資深區議員培叔（蔡根培）妻舅的兒子。
E-mail：