大市止跌回穩，恒指有近50點進帳，有得升嘅窩輪只得7隻。
聯想（992）升25仙，和黃（013）漲1.50元，帶動相關認購輪上榜。聯想輪2287升21%，和黃輪1765升19%。
2287喺3個月後到期，現價3.5仙，溢價32%；1765下個月夠鐘，現價26.5仙，溢價17.5%。你話聯想同和黃會唔會喺呢啲時間之內，分別有32%同17.5%嘅升幅？
先一排，台灣股市急升，隻大摩台指認購輪2270意氣風發一輪，近日大散，完全因為溢價過高而夠鐘日期愈嚟愈近。昨日台指有13點進帳，2270收2.4仙，散23%。高溢價窩輪，隨時有忽然急跌風險。
萬順昌公司輪923，上個月托住喺1元水平，先幾日按盤價13仙，昨日2仙求售，咁就跌去85%。
923下月中到期，行使價2元，正股（1001）現價1元唔夠，隻輪下場唔問都知。
上月底1元托住隻輪嘅（都有幾十萬份成交），同財神松間屋掛住嗰幅字畫相同──戇居。