近年狀態大勇嘅奧迪車廠，自於去年推出全新A4車系後，就連新款A4Cabriolet亦有望於今年內抵港，風頭可謂一時無兩；然而，最近又有外國傳媒，拍攝得到新款S4房跑車進行測試時嘅照片，而據聞新車亦有望於2003年推出㖭。
從相片中可以睇到，新S4嘅造型與現有A4車系相近，但車頭及車尾泵把皆裝有擾流器之餘，廠方更為其改換一套尺寸較大嘅跑車胎軨、車尾加有尾定翼，以及一套將車身離地距調低嘅跑車化懸掛系統，一派高性能跑車形象完全表露無遺。不過，由於新車仍在設計階段，故其車廂配搭仍有待廠方公布後方可作實。
而該消息又指出，謂新S4將會起用一台全新嘅4.2公升V8引擎，馬力輸出頗為強勁，兼會備有奧迪著名嘅Quattro四驅系統㖭；另外，新車又會備有6前速手波，或5前速Tiptronic半自動波供用家選擇。睇嚟當新車於2003年推出時，定會惹來不少車迷垂青㗎。