商廈減租，對公司老細嚟講梗係最啱聽，不過並唔係個個大業主都咁抵得諗。要節省開支，當然重有其他途徑，其中管理費就係幾重要嘅部分。好似灣仔天樂廣場咁，接手管理嘅中房代理就決定將管理費由原先三個二銀錢一呎，減到兩個八，減幅達到十三個巴仙。唔單止係咁，重由今個月起，免收小業主管理費六個月，決定同一眾小業主共度時艱咁話。各行各業都話要裁員減薪，打工仔日日都心慌慌，做老細嘅可以減低營運成本，或者會做吓好心放員工一馬。
早兩日美聯九龍區各分行剛剛搞完周年晚會，大老細黃建業亦有到場，重送出12支香檳畀12間業績最好嘅分行。雖然輕手咗啲，但意義重大。原來當晚重係九龍區阿頭羅國安正日生辰，另一巨頭張錦成亦差幾日就生日，所以順道搞埋生日派對，認真合皮。
蘭西