亞視賽馬節目女主持、有「澳洲葫蘆」之稱嘅朱恩珊，聯同陳敏之同鍾兆康，噚日去咗元朗拍新片《狂野卧底》，首次拍戲嘅朱恩珊扮演揼骨妹，佢為咗逼真演出，不惜真空上陣。
「澳洲葫蘆」朱恩珊同陳敏之都係演揼骨妹，不過朱恩珊一向身材突出，噚日佢更加真空上陣。問佢點解咁搏，佢話：「導演話真空上陣神似啲，而且佢哋話我有葫蘆身材唔好嘥咗佢。我雖然以前做過模特兒，但拍起嚟都有啲尷尬。不過劇情需要，我又覺得冇所謂。」
由於朱恩珊嘅身材豐滿，導演叫佢埋位時竟大叫：「乳牛，乳牛！」結果全場大笑。對於被稱呼「乳牛」，朱恩珊話：「我聽唔到，我當佢講笑，朋友都有叫我『葫蘆』㗎！」
英皇人氣組合Twins，呢個月嚟一直忙緊喺內地拍劇集《齊天大聖孫悟空》，平均一個禮拜就返香港一日做宣傳，所以Twins係忙到乜嘢時間都冇晒，唔使旨意行街買嘢。𠵱家Twins唯一可以買嘢嘅地方，就係機場嘅免稅店啦，而佢哋就最鍾意買店入面嘅化妝品，因為又多牌子價錢又平，蔡卓妍喺上個禮拜就一口氣揀咗幾盒眼影。
金城武喺日本拍完《Returner》後，已經返咗去台灣探屋企人，每年農曆年，佢都會返台灣老家同家人過節。金城武近年嚟喺亞洲區都冇乜人氣，就算香港有電影搵佢拍，佢本身對劇本又要求好嚴格，好多港片搵佢都俾佢推咗。不過呢個世界係你揀人，人揀你，近年佢拍啲片票房麻麻，加上片酬唔平，所以搵佢拍片嘅公司都少咗。
近日網上流傳兩張聲稱係王菲推出第一張唱片嘅照片，相中標明係阿菲一九八五年主唱《風從那裡來》嘅作品。只見年約十來歲嘅阿菲，梳住齊耳短髮，面圓圓嘅佢睇嚟有啲babyfat，驟眼睇感覺有啲似佢偶像鄧麗君。唔知嗰啲照片真係阿菲當年喺北京推出過嘅唱片照，抑或只係網友自製嘅設計圖片呢？
葉佩雯喺樂壇消失咗一段日子，連佢同謝霆鋒一齊合唱嘅《拾荒蛋糕》喺無綫頒獎禮得獎，佢都冇出席。葉佩雯男友Swing嘅Eric前晚幫商台舞台劇綵排時，講到Grace近況，佢話：「Grace𠵱家生活得好開心，個人開朗咗好多，佢學緊服裝設計，得閒就裁吓衫咁。」至於Grace係咪俾唱片公司雪藏？Eric話：「唔知喎，要問公司，可能公司冇通知佢去頒獎禮啩。」