九巴董事長陳祖澤呢排頻頻曝光，除咗講吓九巴裁唔裁員，頒吓勁歌金曲之外，昨晚重同嘟嘟姐同台演出《一筆OUT消》壓軸篇「公益金名人篇」。
陳祖澤曾官拜教育統籌司，又做過香港結算董事長，加上呢排連娛樂節目都做埋，應該無乜嘢難到佢，所以佢順利進入最後兩強，同公益金籌款委員會主席黃家和爭出線。
本來陳祖澤可以奪魁，可惜佢在最後五條題目中答錯兩條唔係咁高難度嘅。其中一條係路透社係邊個國家嘅通訊社，佢答咗美國，另一條係恒生大型股指數有幾多隻成分股，佢又錯，查實係十五，陳祖澤係香港交易所董事，呢條唔識都算抵打。
最後兩人要玩「突然out消」，嘟嘟姐問陳祖澤孫子兵法有幾多篇，佢答七篇，答案係十三篇，陳祖澤無得留低，自歎「書到用時方恨少」。不過黃家和只係贏牙骱，因為二十五萬獎金捐畀公益金。
另外，該節目還搵咗一班公益金高層領導，包括徐詠璇、余錦基、陳黃穗等人去玩，結果徐詠璇喺第四回合俾人OUT咗，而佢更加俾主持鄭裕玲窒佢唔識Bank錢，嘟嘟重話徐詠璇喺專欄彈過《一筆OUT消》唔好睇，徐詠璇即刻話：「TVB好嘢，呃到我嚟，我都知有今日，報應嘛！」
（圖）陳祖澤答北約有九個國家，其實係十八個國家至啱。 《無綫電視》圖片
E-mail：