港股噚日終於跌破11000心理關口，投資情緒又進一步惡化，好彩成交唔多，調整壓力應該開始放緩，恒指收報10964點，跌49點，成交60.83億元。
文化傳信（343）與衝浪平台（8178）則逆市勁升，兩股自從取得北京市軟件合約後，隨即被大戶借消息炒到飛起，文傳噚日再升3%突破0.50元關口，收0.51元。文傳走勢大勇，累積升幅達50%，近日成交更高逾億元。衝浪平台噚日再升28.7%，收報1.39元，較招股價高出2.65倍，噚日成交金額高達6813萬元。
黑客話兩股其實只係純炒消息，所謂軟件合約基本上對兩股嘅基本因素冇咩幫助，隨着成交大增，幕後炒家可能會趁機散貨，跟炒要執生。
i師傅話，停咗牌兩日嘅宏安集團（1222）將喺短期內宣布供股計劃，並計劃復牌，據聞隻股1供4，每股4仙，集資約2.2億元。據聞幕後人士唔想復牌後股價大跌，所以重諗緊計如何護價，其中唔排除向供股人士派紅股或紅利認股證，吸引股東供股。不過e莉莎話，呢單deal好難搵人包銷，幕後人士未必會齊心，相信難逃一跌，此外要留意呢次供股可能與賣盤有密切關係。
國內汽車掀減價戰，但駿威（203）噚日止跌回升，成交大增。傳聞有基金趁低吸納。Cookie話此股可能想配股集資，投資新項目。