昨日我哋介紹咗響今屆東京改裝車展上，一眾突出而又有型嘅新車同概念車後，都應該入正題帶大家睇吓今趟TokyoAutoSalon嘅矚目改裝車同最新零件補品喇！唔知係咪潮流趨勢嘅關係，場內展出嘅K-Car竟成最熱門嘅改裝課題，但炙手可熱嘅辣車車款，仍不乏有新品推出噃！
特約記者、攝影：RaymondLee
鳴謝：富利堡汽車中心
今年響會場採訪較歷屆容易簡單得多，事關有唔少改裝公司均以合組形式，推介同一品牌嘅改裝配件或同一系列嘅改裝車款；而佔據最有利位置兼備受車迷注目嘅，會係有車廠作後盾嘅附屬改裝公司攤位。其中，又以豐田旗下嘅Modellista、TRD同Tom's，重有本田旗下嘅Modulo同Mugen等等至為突出呢！