恒指差不多再散兩嚿，有得升嘅窩輪，同前日一樣，又係得9件，當中包括滙豐（005）同和黃（013）兩件認沽輪，以及杜指認沽輪。佢哋上升，唔使解畫。
下跌窩輪則多好多，溢價高嘅藍籌認購輪，愈近末日，愈跌得淒涼。正股就算唔跌，佢哋都要跌。
滙豐認購輪1704同1735，分別急挫61%同31%；和黃認購輪1765散20%；中移動認購輪1715碌低15%。呢「4大天王」好難救得番，千祈咪手多博反彈。
就算認為恒指萬一點守得住，大隻藍籌有機會反彈，都咪搞呢啲認購輪，要做嘢都應該實實際際向正股埋手。
新嘅備兌輪枝節問題搞掂，下禮拜恢復發行，畀多些少耐性，等啲新輪登場至諗對象。
油股窩輪數據比較實在。隔晚油價散0.83元，中海油（883）跌3.8%，拖低啲認購輪，1759同1762兩隻中海油輪分別唔見13%同12%。吼住1759，現價11.7仙，喺10仙邊邊上車。