美股跌唔停，港股試萬一。杜指連跌6日，前晚再跌96點，收9891。按數面計，杜指50日線喺9893，已稍為跌穿，但50日線仍在上升中，因此當佢仍守住50日線。不過，好友唔好再瞌眼瞓，否則杜指跌穿埋50日線就麻煩。
恒指50日線失守後持續弱勢，噚日再跌195點，不過暫時都守住萬一點關口，至於能夠守幾耐則好難講。近幾日市場氣氛明顯轉差，幾間賺錢大銀行都話裁員，噚日又傳出港府稍後公布嘅失業率會高於6%。歐美國家失業率高，所產生嘅社會問題會冇咁嚴重，因為佢哋嘅社會保障制度健全，失業可領失業救濟金，但香港則冇呢支歌仔唱。
唔該啲大公司學吓乜嘢叫「社會承擔」，賺錢其實唔使賺到咁盡，香港利得稅率低，算係對特區政府投桃報李又如何？
趙飛雲噚日都係按兵不動，一來個市重有機會跌，二來想買嘅股份未到價。港股今年可能都係上落市居多，投資策略應該買股唔買市，中海發展（1138）受惠中國入世，加上稍後將發A股，應可跑贏大市。上實（363）炒大上海概念，中國GDP保持7%增長，都係可以逢低吸納嘅股票。