最近唔少仙股都有異動，其中一隻係好耐冇炒過嘅榮盛科技（1166），最近成交量大增，小初以為有搞作，但經紀陳話隻股唔排除會併股，然後再供股，將股本重整，如果亂咁追入，因住走唔切。
榮盛噚日只係升咗0.1仙，收1.1仙，升幅已經係10%，所以唔怪得小初心郁。
榮盛𠵱家發行嘅股數接近190億股，大股東揸住唔夠22%。早兩年隻股周不時發行新股買嘢同集資，曾經炒過一大輪，股份分散到不得了，長期徘徊仙界而且成日1仙淨沽，所以做下股本重組亦唔出奇。
其實之前好多仙股例如星光生物科技（1051）同埋星港地產（245）都玩併股，所以榮盛有類似傳聞亦唔意外，總之一句，食得鹹魚就要抵得渴。
另外，交投淡靜嘅冠華國際（539），噚日突然升16%，收51仙。經紀陳話隻股同以往永義（1218）班炒家已分道揚鑣，現時係另一批人打莊。