新登場：
澳門美食殺入筲箕灣　燒烤最撚手

每逢假期除了到深圳消費外，亦不乏過澳門「搵食」之人，美食同賭博娛樂簡直成了濠江的標誌。未到周末就心癢癢要起行過大海？不如去筲箕灣頂住癮先啦。筲箕灣澳門賽馬會樓上有間新張餐廳，裝潢成一個澳門街頭縮影，以供應燒烤食物為主，豬、牛、羊、雞、海鮮十多款食物樣樣有齊，即令該區熱力急升肉香處處。

記者：莫麗嫦　攝影：伍慶泉

荷蘭BABY豬背排$48（12安士）
小豬排肉質幼嫩，脂肪少兼骨仔細細，唔會好似食牛肋骨一樣巨型到嚇死人。師傅用秘製醃料將背排醃過後，再塗上燒烤汁喺面，用慢火燒熟，甫上枱立刻感到其逼人的熱力與「味」力。

試味報告：
雖然骨多過肉，但惹味入骨，果真食之無肉，棄之有味。

鹽燒沙甸魚$48
除了馬介休，沙甸魚亦是葡式食品中的常客。本身味帶腥的沙甸，燒至香口旨在辟去腥味，燒烤時只加海鹽調味。食時加多少許檸檬汁，腥味一筆勾銷。

試味報告：
外皮焦香，簡單的調味令魚的鮮味更見突出。

葡式魔鬼大花蝦$110
餐牌內有魔鬼式燒羊架同大花蝦，其名得來只因大夥兒都會用手拿燒烤的食物大嚼，食相猶如魔鬼進餐一樣，開各位一個玩笑。

試味報告：
烤後的大花蝦會配上一碟用牛油及香草調成的文也汁，惹味中帶牛油香。

焗葡國雞飯$40
說起澳門式的葡國餐，一定少不了葡國雞的份兒。葡國雞的汁料是師傅親自調製，沒有沿用傳統葡式重黃薑粉味帶苦的葡汁，反而將椰汁的分量增加，配合港人口味。

試味報告：
葡汁味道較鹹，拌飯同食較佳。

脆蘋果金寶$26
買完馬仔餓餓哋，上去樓上食幾味；買馬仔最緊要好意頭，叫個意頭甜品脆蘋果金寶，面頭的脆面是用牛油及麵粉做成，焗至金黃色，遠睇似足碗裏金粒，若改名叫盤滿缽滿必定更受歡迎。

試味報告：
內層的蘋果保留新鮮時的香甜，外層的脆皮長時間亦不變腍。

酥皮焗黑菌湯$30
黑菌給人的感覺永遠如金一樣矜貴，小如一個迷你薯仔的黑菌已需要數千元。今回似是金價大跌，一碗有薄片黑菌湯都只係盛惠30大元，好好好抵呀！

試味報告：
一打開酥皮脆面，黑菌的香氣已搶閘而出，湯底雖然係牛肉湯，但黑菌那濃郁的香氣又哪有材料可蓋過。

店名：澳門街
地址：筲箕灣寶民街2號海峰中心1樓2號舖
電話：31064102
座位：約80個
營業時間：早上8時至晚上11時（如晚上有球賽直播，營業至凌晨1時）
付款方法：現金或信用卡(Visa,Master)