財政司司長梁錦松上個禮拜請傳媒去參觀壽臣山新官邸，重播咗套《帝國驕雄》畀大家睇，啲音響靚到絕。記得財爺上任之初，話任志剛總裁教佢設計家庭影院；唔知呢套AV系統任總有冇聽過？滿唔滿意？
八方係音響門外漢，但瞄一瞄阿松對喇叭，都知係正嘢──係美國Madrigal廠嘅Revel，呢系列喇叭獲獎無數，睇碟又得、聽歌又正。其中最頂級嘅座地喇叭有兩款；一款叫Salon，定價二十一萬二，另一款叫Studio，平少少。阿松嗰對應該係後者，不過佢買咗一段時間，而且有折扣，準確價錢八方都八唔到，但十萬八萬冇走雞。
各位想唔想照辦砌番套歎吓呢？香港代理Revel嘅公司叫Excel，中環中航大廈有陳列室，阿松成set嘢就係佢哋設計，高手嚟㗎。
﹙圖﹚阿松家庭影院AV設備先進，有一對值成10皮嘢嘅Revel喇叭。
E-mail：