大多數人昨日估港股會碌低，就係估唔中，恒指有進帳42點，但下跌股隻較上升股隻多。
有得升嘅窩輪，兩隻手掌數得晒，得9件。排頭位嘅係杜指認沽輪1717，收5.8仙，升16%，有30球易手。未來幾日點走，要睇美股變化。美股昨晚若然企定定，1717今日難免會回番落去。暫時觀望住先。
滙豐（005）跌50仙，但隻認沽輪1739早段升過一陣之後，收番59仙，打回原形。和黃（013）跌50仙，隻認沽輪1769只係升得3.6%。
滙豐沽輪冇因滙豐下跌而上升，和黃跌幅亦唔大，加上兩大國內電訊股止跌回升，短期大市未必咁悲觀。好多人睇恒指下試10800，未到呢個位，個市可能已經反彈。
台灣股市上禮拜五散3.1%後，昨日又跌1.3%。
大摩台指認購輪2270，跟得好快，昨日下跌9.1%。
台股累積升幅過大，有回吐壓力，2270溢價有1成半，個半月後到期，屬高風險輪，咪貪平上車。