格老講話內容與市場預期有些少出入，佢話美國經濟仍有下跌風險，一方面暗示仍有減息希望，但一方面又令憧憬經濟復甦班好友好夢成空，投資者一時間都唔知點做至好。港股噚日先跌後升，Cookie話港股跌至11000水平就見有買盤接貨，所羅門重話市場游資充裕，建議投資者每見調整就趁低吸納，因為經濟有望復甦。高盛亦因此調高國泰（293）投資評級，似乎美資依然看好經濟復甦及股市前景，應該係造好嘅先兆。
耀科（143）噚日勁挫15.6%，收0.54元，成交達5874萬元。i師傅話上午已有少少斬倉迹象，聽講話好似有啲細莊家冇錢找數被迫斬倉，但股數唔多。不過，股價突然下挫，可能會對其他莊家構成壓力，所以暫時只宜觀望，唔好亂咁撈底。
中建數碼（1169）噚日終於完成首階段最後一批股份配售，噚日配售嘅舊股共3.68億股，每股0.40元。隻股嘅上升阻力應該已經消除，日後海爾將進一步增加在中建數碼嘅持股量，將有一連串好消息配合。不過隻股啱啱配售完，短期內或多或少都會有啲壓力，但應該唔會跌穿0.40元配售價，低位可以小注投機。
科維控股（586）噚日公布話簽咗份冇約束力協議，可以收購深圳能源股權進軍國內能源事業，復牌後即大上大落，成交達1億元，最後升13.8%，收1.49元。噚日隻股開始有推高散貨迹象。不過黑客話，重有動作跟尾，可以玩多轉。