一年一度嘅日本東京改裝車展（TokyoAutoSalon2002），剛於上周末及周日舉行，想唔到新一屆嘅改裝車展，竟承接住去年十月東京車展嘅餘威，除有多間車廠大事推銷本身嘅改裝品牌外，最令人喜出望外嘅，係響會場中竟有不少未正式曝光嘅新車同概念車展出；有見及此，今趟東京改裝車展巡禮，我哋不如睇吓呢批新車種，以求先睹為快啦！
特約記者、攝影：RaymondLee
鳴謝：富利堡汽車中心
被稱為係626車系嘅入替車款，經已有計劃響今年5月正式登場，但此刻經已有跑格鮮明嘅改裝版出現；相信此車定會對同級嘅豐田Altezza，構成一定嘅壓力㗎。
呢部咁有古典風味嘅概念新車––Cosmo21，查實係用上跟RX-7相若嘅雙轉子引擎，雖然廠方並無公布此車嘅引擎數據，但睇嚟呢部咁矚目嘅概念車，單係包裝就經已教人印象深刻呢！
呢部取材自MX-5嘅概念小跑車，同樣以懷舊嘅包裝去取悅車迷，然而響佢身上重散發出一分如英國AstonMartin跑車嘅氣息㖭！而新車則有望於今年下半年面世。
將於今個月底正式登場嘅鈴木Lopin，走懷舊小車路線之餘，廠方更刻意包裝出呢部勁辣SS版本，除有一對桶形跑車座椅、Racing避震同大口徑胎軨組合外，嗰對特大嘅霧燈配搭，更予人有刮目相看之感㗎。
呢部造型無咁突出嘅Hayabusa小跑車，尺碼不過為3790×1760×1100mm，之所以俾人看成新一代跑車王，皆因佢嘅車重不過係550kg，但就擁有一台1.3公升直4DOHC引擎，輸出竟然有驚人嘅175ps/9800rpm，以及14.1kgm/7000rpm扭力數值，確實令人側目㗎！
剛奪得2001年世界越野車賽冠軍嘅富士Impreza戰車，真身果然係不同凡響，因而令唔少車迷駐足細看一番，果真有冠軍級戰車嘅魅力喎！
富士響2001年嘅世界越野車賽大豐收，承着餘威廠方將於今年有多個特別版本推出；而呢部超輕量ImprezaWRXSTi嘅RA-C特別版本，唔知佢又會否能夠跟香港嘅車迷見面呢？
雖然呢間改裝車廠同部車嘅名字，給香港車迷有點陌生之感，但呢部「我來也」鷗翼跑車嘅造型，及時值近40萬港幣嘅身價，卻令人刮目相看。佢用上日產一台SR20VE嘅2.0公升直4DOHC偈（馬力204匹），並採用6前速手波，而0至100公里不過5.2秒咋！
名車配美人，向來都係呢類大型車展嘅賣點之一；不過唔知係咪經濟差嘅緣故，早前嘅東京車展就畀人有失色嘅感覺，但對比起今趟規模無咁大嘅AutoSalon車展，既有大Power嘅辣車展出之餘，重有唔少新車種露面，予人有花多眼亂之感㗎；而最令一眾傳媒（包括小記在內）留有深刻印象嘅，則係一班笑容可掬、兼且意態撩人嘅Showgirls喇！幾乎要佢哋擺出甚麼Pose都得㗎！佢哋敬業樂業嘅精神，真係唔到你唔服㗎！