負資產到底有幾多種？若要救，先救哪一種？
負資產大致可分三種：
第一種負資產是「濕濕碎」負資產。一層樓買時值一千萬，借銀行七百萬，月入二十萬，月供七萬；現時，層樓值五百萬，但銀行戶口有三千萬現金，這類人叫「濕濕碎」負資產。
第二種負資產是「麻麻地」負資產。一層樓買來自住時值三百萬，供銀行二百萬，月供二萬，月入三萬，供完樓還有一萬。
如今，層樓值百五萬，仍欠銀行二百萬，月供萬五，月入二萬五，仍然每月有一萬蚊使，𠵱家重更好使，這叫做「麻麻地」負資產。
第三種負資產是「徹頭徹尾」負資產。畢生積蓄買一層樓自住，買時三百萬，借了銀行二百萬，月入三萬，月供二萬；現時，層樓值百五萬，仍欠銀行二百萬，但月入得番二萬，供得樓來又無錢開飯，於是信用卡碌完一張又一張，滾雪球咁，碌出十多萬卡數。這類人才是「徹頭徹尾」的負資產。
「徹頭徹尾」的負資產一定應該救，一定有得救，明天先請李超人先生去救。救得到，有李先生「着數」，救唔到，亦無李先生「蝕底」。
按：一、初初寫專欄，有《蘋果》高人提點：「揸住支筆唔係大晒，寫嘢時要顧住別人感受。」好幾聲暮鼓晨鐘！好一句金石良言！自此之後，行文亦溫柔許多，心情亦舒暢好多。
二、香港處於通脹時期的樓宇按揭比例是七成，𠵱家是通縮，又照舊是七成，點搞？搞邊科？負資產的成因，是與樓宇按揭成一個永世不解之結，難道會有第二個負資產潮?!
三、昨天的工作——包括寫稿、籌備學校畫展和睇書檔。正當三邊奔走時，發覺有狗仔隊跟蹤，無意間，聽到其中一位狗仔隊成員說：「唉！跟得陳生好辛苦！」
我認為狗仔隊亦是一份工作，只要能敬業樂業，自然自得其樂，呢位老友記，唔好再呻啦！香港地，重有好多人辛辛苦苦都搵唔到工做！
電郵：
每日連載刊出