外國有大受歡迎擁有魔法的哈利波特，而在香港大熱的「魔法」則是掌相學，當年批王菲竇唯會離婚而為人熟悉的蘇民峰，近日又批張柏芝會「火上加油」行衰運，結果報道見報當晚，柏芝飛車時，竟遇意外。
莫非蘇民峰和哈利波特一樣，擁有神秘的魔法石？
蘇民峰日前為眾星批命，他預言馬年（即下月十二日起）許志安、鄭秀文會拉埋天窗；王菲、謝霆鋒感情不變，而Twins則會一世夠運。
五行夾 行大運
許志安和鄭秀文拍拖多年，其間一直傳出離離合合的消息，尤其近幾個月傳分手傳得最勁，不過蘇民峰則批兩人馬年有機會結婚。
「鄭秀文屬水，要火；許志安屬土，土生木、木生火，兩個都夾㗎，鄭秀文二十九歲至三十四歲行大運，有五年財運，一直行到○六年，○二、○三年更加行緊個人高峯運，而許志安○一至○三年都行運，但個人高峯運喺三十六歲至四十一歲。」
「安仔馬年姻緣運到，○二、○三年都有桃花，好大機會結婚。而鄭秀文屬鼠，馬年犯太歲，感情會發生變化，一係分手，一係結婚。」
王菲、謝霆鋒近來傳感情有變，不過蘇民峰則預言兩人情不變，而阿菲同霆鋒，多年來一直是蘇民峰的客戶。
「佢哋應該唔會分手，今年蛇年，出年馬年，感情都冇問題，反而後年羊年要小心經常會嗌交，但都唔會引致分手。容易分手嘅年份係龍年同雞年，○五年雞年就大鑊啲，因為佢哋嘅夫妻宮相沖。
「佢哋嘅命格幾夾，都係屬木，農曆七月出世，思想相似，行運又一齊行，○四、○五年係事業高峯。」
Twins去年大熱，如旋風席捲樂壇，今年能否keep住氣勢？蘇民峰表示兩人一世夠運，○二、○三年都能保持運勢。
「佢哋唔係虛火，蔡卓妍同鍾欣桐都屬土，冬天出世，要火，而土生木，木生火，蛇年會有偏財，兩個命格冇相沖，好運、衰運都一齊行，所以運程幾夾，○一至○三年都屬火，所以嚟緊兩年都可以維持運勢。
「如果兩個比較，蔡卓妍暫時好運啲，佢財氣通門口，命入富甲，財氣重好，○二年都會忙過鍾欣桐，二十五至三十歲事業會有突破，大運由三十五行到六十五，一世好運；而鍾欣桐二十五至三十五有十年大運行，由三十至三十五歲最好運，之後要到五十五歲，會有三十年運行，晚年安樂。」
最近張柏芝經理人向太陳嵐經常出來鬧陳曉東，本來記者想問蘇民峰，兩人的八字是否相沖，奈何沒有向太的出生年月日，不過蘇民峰卻說此事和八字無關。
「呢啲嘢唔關八字相沖嘅事，好簡單啫，你咪當向太係張柏芝嘅媽咪咯，阿媽對住個咁嘅男仔，就梗係唔鍾意啦！」
現時找蘇民峰批命，起碼要三個月預約，只有逢星期三、六睇風水、批命，平日休息，有錢都不賺果然夠囂張。
今年四十一歲的蘇民峰，真人比上鏡年輕，他說喼弗之道，是keep住去蒲，美容心得是用凍水洗面，不要用番梘亦不用面霜。
為了保持身形，他將自己的磅數維持在一百三十至一百三十五磅之間，一超磅則進行減肥，每周都會打拳強身，每次打兩小時，他更學過跆拳道、空手道及太極。
撰文：張止寒
協力：羅慧敏
攝影：陳志嵐