全世界最長嘅自動行人電梯由大道中開始上半山，令附近住客慳番唔少腳力，好多沿住條電梯嘅商業大廈亦以此招徠，吸引租客。
雲咸街六十號有一幢新型大廈，由信和集團與南華集團聯合發展。信和係地產商，興建商業大厦，經驗豐富；南華集團屬下嘅「南華資訊及科技」唔知點解，亦會搞埋地產，與信和合作？
不過兩間公司都有個共通點嘅，就係老闆嘅英文名同名同姓，都係叫做RobertNg。
如果對商界唔熟悉，叫位新畢業嘅大學生繙譯呢個名，一定會搞錯，事關信和RobertNg叫做黃志祥，南華RobertNg叫做吳鴻生，兩者完全冇直接、間接關係。黃志祥來自新加坡，星馬印一帶Ng、Ong、Oei、Wee都係姓黃，做繙譯一見呢啲就頭痛。
雲咸街呢間新大廈TheCentrium招租，每呎十四蚊，免租期六個月，特色係有六層停車場，揸車返工，方便到極，而且鋪晒光纖，夠晒智慧性。
貿易E間寫字樓租約，不日屆滿，想租過一間又平又靚嘅，經紀介紹佢去TheCentrium，於是貿易E特登喺朝頭早行去望吓，佢喺租庇利街上恒生銀行，經中環街市到行人電梯，唉吔，朝早時間，電梯只落不上，貿易E惟有行樓梯上去，行到索氣；到咗下午，部電梯就只上不落，即係話喺荷李活道?雲咸街返工、放工嘅方向啱啱與行人電梯上落時間相反，完全冇方便到，只係方便咗住響半山區落中環返工嘅老友記！