聖誕加新年呢個悠長假期，大家足足餓咗兩個星期「碟癮」！好在今個星期有《美國處男2》（一區碟）新碟返貨，此片在美國大收旺場，為咗令睇過嘅人，都要畀錢睇多次，所以碟內追加咗大量未公開片段同電影資料。如果嫌咁都未夠抵，你重可以將隻DVD放入電腦度，大玩抵死鹹濕MiniGame。百零蚊嘅價錢，有戲睇又有Game玩，你話點可以唔買！
記者：馮彥彰
片長：110分鐘
美國發售日：1/15/2001
公司：UniversalStudios
音響：dts、AC3
區碼：1區
售價：約$150
如果大家記性好，應該重記得《美國處男2》係喺舊年年尾香港上畫，所以呢套片真係非常新。其實套戲真係幾搞笑，戲內大玩美國校園笑話，而且內裏大部分劇情，都同現實都幾接近（當然加入咗誇張手法表達啦！）。如果為人父母者咁啱子女要過去讀書，真係要喺度學番兩招傍吓身。
故事內容方面，主要講述五位高中親密戰友亞占（Jim）、家榮（Kevin）、奧斯（Oz）、芬治（Finch）及硬條（Stifler）在剛完成首年大學課程後，決定喺暑假時組織媾女團，相約租用海外度假屋狂歡。呢五條友都各自睇中一個靚女，而喺追女嘅過程中，當然有連串嘅騎呢事件發生啦！而故事嘅主旨，就係講述縱使身邊嘅時間同人物不斷改變，但「Friend足一世」嘅友情則未有動搖。
戲入面除咗大玩美式笑話外，重有唔少玩屎、尿、屁嘅笑料，而不可或缺嘅，當然係一啲有味嘅鹹濕笑話啦！戲入面最經典嘅幾幕，就係5位主角講述「破處嘅道理」，大家點都估唔到幾個「鹹濕仔」想失身，竟然可以搞出咁多笑料，當中尤以「失敗的自瀆事件」同「搞同性戀」幾幕最頂癮。
其實一區碟，大家都知會有唔少隱藏嘢，呢隻碟亦一樣，喺開機後，先進入去MENU畫面，再選BONUSMATERIALS去第二頁，再按遙控器的上方按鍵一下，即可以進入隱藏片段入面，裏面就有條未經刪剪嘅小片段，係乜嘢？自己睇啦！
呢隻碟除咗睇得之外，唔講唔知，原來裏面重隱藏咗好多抵死MiniGame，大家只需要將隻DVD放入電腦度Play就玩到（電腦需要配備有DVDROM），而內裏遊戲分別有飛機、撞磚及問答等，如果數數埋埋，都超過十個，可以喺睇戲之外，重有咁多嘢玩，都算係少有。