容祖兒和Twins的崛起，均由同一經理人霍紋希（Mani）一手促成，對於有傳Twins風頭威脅Joey，英皇自己人打自己人之說，Mani卻不認同。
Mani說：「Twins𠵱家受歡迎，根本唔應該針對Joey嚟比較，可能大家係同門嘅關係，啲人至會擺埋一齊嚟講。Joey嘅表現不嬲穩定，唱片銷量又保持到，但Joey係大個咗，新人初初起步嘅時候，做嘢會好密集式，Joey𠵱家會開始將音樂路向，轉做實力派，我哋唔會再同佢做密集式嘅工作，會挑選合適嘅嘢畀佢做，我哋希望今年可以畀Joey去外國進修音樂，等佢喺音樂嘅路向上發揮才華。」
至於Twins，Mani表示現階段首要是安排她們上堂惡補唱功，她說：「好明顯市面上接受Twins嘅原因，係佢哋夠鄰家小女孩，但佢哋唱功未得，我會盡量抽時間安排Twins定期上堂，佢哋嘅形象比較百變，又年輕啲，嚟緊呢年佢哋會玩多啲新花款，同埋會有好多新嘗試，希望可以趕喺呢個年底開到演唱會。」
今次在訪問中與祖兒合作拍照的，是一頭肥嘟嘟的波斯貓，名叫「小忌廉」，主人是鄧兆尊。本來祖兒很想親自攜帶其愛貓「懵丙」和「妹妹」到影樓，可惜她那兩頭波斯貓太活潑，一緊張就失禁，所以只能乖乖留在家裏。不過，祖兒對「小忌廉」倒很疼錫，每當抱住牠時，只要一發覺牠周身騰騰震，便會跟貓咪喃喃細語，努力𠱁「小忌廉」開心。
撰文：朱芷瑩
攝影：林德雄