近日盛傳漁農自然護理署正副署長韋徐潔儀同廖季堅有「特殊關係」，噚日廖副署長出席公開活動，就俾八方捉住佢嚟問，佢都大大方方咁答八方話唔會介懷緋聞事件，但係就唔會對啲「揣測性」嘅報道作評論，而且話晒都係佢自己嘅私人事，所以佢話唔使同公眾交代喎。
不過八方問多兩問，佢又再講多兩講。有報道話係佢自己嘅下屬向外界發告密信，話佢同署長有「非尋常」關係，佢話成個漁護署有成二千幾人，有啲員工重用緊舊思維、舊方法做事，即係唔做唔錯，有得升先做之類。佢睇唔過眼，喺積極推動認真工作文化時，有啲員工唔服，條氣唔順咪走去告密囉。不過佢都算大方，猛咁強調每一位同事都係好同事，但係就各有「短處」。
八方跟住一提起即時離任的韋太，佢就話：「韋太完成咗四年零十個月嘅工作，一齊開拓咗好多新方向，……」嘩！你睇佢對韋太幾瞭如指掌，一講就講得出韋太喺漁護署做咗幾耐，兩個人做事又一條心，真係鐵柱都可以磨成針！
E-mail：