香港首富李嘉誠經常捐錢畀內地辦學，不過，據台灣中央社報道，佢最新一個發展項目，就會喺內地設立第一間民辦嘅商學院，名為「長江商學院」，但係學費就全亞洲最貴，每年至少要二十四萬蚊人民幣!
報道又話，「長江商學院」嘅行政人員工商管理碩士（EMBA）學院，會起喺北京最熱鬧嘅「黃金地段」王府井大街，九月就招生；而工商管理碩士（MBA）學院就會喺深圳，明年三月招生。「長江商學院」嘅投資雖然全部由李嘉誠基金會捐贈，但係報道就話，李嘉誠進軍內地MBA已引起內地媒體嘅熱烈討論，究竟佢係為咗公益抑或賺錢？不過，八方向李嘉誠基金會求證嘅時候，發言人就話，多年來李嘉誠喺內地有無數教育及醫療捐資項目，相信冇人會認為佢係以牟利為目的，但係究竟李先生係咪真係喺內地捐咗間商學院，就暫時未搵到人問清楚。
（圖）台灣中央社報道李嘉誠捐錢在內地辦長江商學院，學費全亞洲最貴。
E-mail：