容祖兒（Joey）的同門師妹Twins，火速上位成為樂壇新人王，雖然Twins人氣勁，但Joey亦懂得居安思危，她準備在年內出外進修，以增強音樂造詣，鞏固其英皇一姐的地位。
容祖兒（Joey）一直穩坐英皇一姐之位，但自從同門師妹Twins於七個月前出道後，人氣一時無兩，更直接威脅Joey，Joey也承認Twins確是十分厲害。
Joey說：「我都覺得Twins好犀利，喺今年新人入面，佢哋無論氣勢同實力都好夠，我都好鍾意佢哋。但講到威唔威脅呢樣嘢，我就唔會去諗，因為咁諗會好辛苦，況且一間公司又唔會只得一個歌手，我覺得𠵱家英皇就好似日本Johnny's事務所嘅香港版，我哋成日都會互相鼓勵。」
眼看着Twins邁向成功路，每天跑幾檔做宣傳，既拍電視劇又拍電影，橫掃香港樂壇頒獎禮的新人獎，這種做新人王、風頭躉的滋味，其實Joey在兩年前亦曾嘗過。Joey自言亦覺得現在的Twins，就像昔日的自己，而她則由當初的英皇小師妹，進階變成師姐了。
Joey笑道：「我都覺得自己大個咗，始終入行日子長過佢哋，佢哋𠵱家好似以前嘅我，啲期表排到滿晒，不停咁做，佢哋真係好有幹勁。但新人起步後，要諗點去keep住會幾難，頭兩年公司會幫好多，但到第三年就要睇自己嘅實力。」
其實除了Twins以外，英皇亦正在培育謝霆鋒的十三歲小師妹梁樂瑤（Isabella）。對於公司所捧歌手愈來愈年輕，Joey卻毫不擔心地說：「大家各有各做，有唔同嘅人至有新鮮感，喺嚟緊呢一、兩年，我知自己唔會做偶像，我又係一個唔可以靠容貌嘅歌手，我可以做就係畀心機唱好啲歌。」
儘管Twins人氣不凡，但Joey近期在新城《勁爆》及商台《叱咤》兩個頒獎禮上，依然躋身女歌手三甲獎項之列，與鄭秀文及陳慧琳兩位天后角力，年僅二十一歲的Joey對此謙虛地說：「能夠同兩位天后級女歌手一齊攞獎，梗係開心啦，我覺得自己只係起步，未有條件去晉身天后。」