藍田啟田萬有街市正好位於啟田商場內，逛街買餸二合為一，非常就腳。喺兩年幾前街市判咗畀私人管理，經全新改革後唔單止有舒適嘅空氣調節，環境亦較從前乾淨及企理，商舖更多元化，除咗本地貨之外，更有特色印尼雜貨舖，另外更有較少見嘅臘鴨腸，唔知大家又食過未呢？
記者：陳冰麗
攝影：周旭文
鴨腸雖然係啲下欄嘢，但只要將佢風乾後就變得有食用價值。呢個雜貨舖包辦水果、雜貨等多種乾濕貨，喺呢個街市算係一個較大型嘅雜貨舖。
而臘鴨腸亦只有呢處至搵到，除咗臘鴨腸之外，呢度亦可以搵到由大澳出產嘅方便裝油浸鹹魚，有香味及淡味兩種任揀。
聯成鮮果海味雜貨K81
臘鴨腸味帶甜，除咗比較幼身之外，食落都有幾分似臘腸味道，但就稍為韌咗啲，可以清蒸，嫌佢過韌可以煲湯，蜜棗都可以慳番唔使用。
對原條曬乾嘅鹹魚無信心保證，可以試試呢款包裝油浸鹹魚，乾淨而又符合衞生，而且重係本地大澳出產，品質都有一定保證，細細包又方便食，不妨試試。
呢間印尼商店係街市改革後至正式經營，所以開舖至今只有兩年幾，但客似雲來，除咗大部分印尼或菲律賓人幫襯外，亦有唔少本地客。老闆李生話店舖最搶手嘅有特色印尼甜豉油、即食麵等，如果鍾意食甜嘢嘅人，亦有好介紹，馬來西亞特產三叔公綠豆餅、黑芝麻粿雞，甜度適中，作為下午茶點唔錯㗎！
李健印尼商店K38
來港大概2年嘅印尼人Ani話甜豉油喺印尼好盛行，用作蘸點任何肉類都好好味。分別有圖右的老牌子CAPBANG($8/300ml)及圖左的ABC($7/275ml)。
印尼即食麵叫MIGORENG，SATE解作撈麵，兩者種類都好多，有沙嗲、辣椒醬、辣椒油、咖喱、雞湯、牛丸味等選擇，全部都係十蚊八包任配搭，幾抵食㗎！
街市改革前已有呢個果檔，而且重係較大規模類型，賣嘅雖然係啲大路水果，但勝在夠平，而且部分已經過造嘅水果，呢度仍見到蹤影，龍眼、香梨係其中一種，分別只售$8一磅及$5一磅，質素都唔錯，而間中都可以搵到啲較少見嘅新奇品種，好似有成隻手掌心大嘅特大奇異果，大陸出產，今年至有喳！
啟興鮮果K46
呢款奇異果比平時所見嘅至少大三分之一，比手掌心重要大，每個都只係$1.4-$1.5，但就多肉食，食味又唔太酸，堪稱特大奇異果。
呢個時候間唔中都搵到楊桃嘅蹤影，不過未必夠甜多汁，呢度出售嘅楊桃夠大個，食落又甜又多汁，行開呢個街市，不妨買啲返去試！