八方噚日收到份開幕典禮嘅採訪通知，嘉賓陣容鼎盛，衞生福利局局長楊永強、社會福利署署長林鄭月娥、電訊盈科集團副主席張永霖等等，認真唔嘢少。八方重以為特區政府繼六百萬獎勵捨身救人英雄之後，又有乜重大德政要宣布，睇真啲，原來係專辦長者服務嘅工聯康齡喺觀塘有一間長者中心開幕。
呢類社區設施嘅啟用禮，確係好少有咁多高官巨頭得閒應酬。長者中心嘅負責人同八方講，啲高官咁畀面係因為中心過去好切實咁為老人家服務，切實到啲高官都好詫異咁話。其實諗真都唔需要詫異，工聯康齡係由工聯會資助，工聯康齡主席李澤添（圖）係全國人大代表暨工聯會前會長兼大紫荊勳章得主，舊年另一大紫荊勳章得主楊光亦係由工聯會推薦嘅，工聯會對社會咁有貢獻，高官巨賈又豈敢待薄呢？
E-mail：