白韻琴近日同男友阿Paul四出睇樓，想盡快搬離住緊嘅柏麗園。近日馮仁昭就喺淺水灣撞到白姐姐睇屋，見佢同阿Paul睇咗五、六間咁多，連鄭秀文以前住過嘅淺水灣麗景道十九號都睇埋，但都唔啱。
白姐姐帶埋「水晶宮」個老闆幫手睇吓風水，但偏偏睇親啲單位，門口坐向就只係旺阿Paul，唔旺白姐姐，風水師話原因係幾個單位都「不宜老婦」，即係屋中最大年紀嘅女人，就會破財兼多病，入住遲早搞到屍骨不全㖭。搞到白姐姐愈睇愈冇癮，嬲嬲哋索性對住阿Paul講：「你不如娶個後生女！」
睇咗幾粒鐘，終於都畀白姐姐搵到淺水灣麗景道二十號一個單位，有海灘景，二千呎要四萬幾蚊租，風水師話最好呢一個，會令佢兩個都旺財，但始終唔多利白姐姐嘅健康，風水師同白姐姐講：「你身體唔好係定數，否則點會睇親啲單位個個都不利你健康。」
黃家諾噚日去新城，接受《一個靚墟》節目訪問。佢噚日心情好靚，重話早前見過女朋友關之琳（之之）媽咪，而家諾媽咪早排喺外國返港時，都同關之琳一齊食過飯。
問到媽咪有冇叫快啲拉埋天窗，黃家諾話：「我媽咪唔理我呢啲嘢嘅，總之食飯係普通事啫。」
張惠妹日前喺台灣接受前唱片公司老闆張小燕（右）訪問，大談自己感情經歷。原來阿妹咁大個女拍過三次拖，初戀男友同佢係家鄉台東嘅青梅竹馬，兩個到𠵱家重有聯絡。而阿妹第二個男友係喺佢心情最唔穩定嘅時候識，佢話當時自己以工作為重，冇理男友好自私喎。至於第三位男友，即啱啱分手嘅周立璟，阿妹話佢哋到𠵱家重係好好朋友，好好嘅合作夥伴。
邱淑貞（豆斗）老公沈嘉偉前晚聯同兩個老友，同埋上山詩鈉、上山個女一齊喺跑馬地喜慶坊食飯，食到十一點半，人哋舖頭落埋閘，佢哋先走，上山詩鈉個女，着住條裙跳跳紮，十分可愛。佢兩母女自己搭車走，沈嘉偉就揸架黑色保時捷跑車載兩個男友人離開，未見邱淑貞出現，唔知佢係咪留喺屋企湊仔呢？
早排有報館連續兩日收到有人冒李丞責發聲明，內容係話畀佢睇過風水嘅人，行好運係佢嘅功勞，行衰運就係當事人嘅問題。馮仁昭打過電話畀李丞責，問佢得罪咗乜嘢人，佢話估計一係行家整蠱佢，一係張柏芝嘅fans，因為早排佢講過張柏芝呢兩年都唔好運，啱啱買嘅康樂園風水又唔係太好喎！