班對沖芬佬噚日果然如阿虎所料，將恒指50日均線質穿，製造破位技術陷阱，令恒指在技術上出現下降軌道，令投資者不敢大肆入市撈底。格佬周五演說，市場估計佢會話減息周期告終，甚至會暗示經濟復甦，息口可能會上揚。另外，有消息話本地發展商可能趁格佬重未出口話加息，即刻搵西九龍樓盤作戰場，減價推出新盤，所以噚日連一向唱好嘅瑞銀都加入沽售地產股行列。
建滔化工（148）噚日反彈8.7%，升至6.20元收市，成交額達到1.05億元。據Cookie講，其實建滔冇諗過配股集資，不過有基金睇中佢投資嘅線路板業務，加上美國科技業已開始帶頭復甦，而隻股貨源一向歸邊，所以要求公司發新股。公司見配售價毋須大幅折讓，又可減低財政壓力，所以同意進行配售，由於認購反映理想，配售額由5000萬股增至6000萬股。不過i師傅話，建滔業務前景只屬一般，班友其實攞批貨嚟炒，股價炒上7元樓上就可能會出貨。
光通數網（155）噚日勁升16.6%，收報0.028元，成交大增至2654萬元。據黑客話，此股就嚟會公布一啲新投資，因而可能涉及發行新股，甚至可能出現控股權易手。不過現時尚未到價，應該重會炒多一轉，但幾時至到價，佢就話唔太清楚。
富豪（078）噚日突然有異動，全日升15.3%，收報0.196元，成交升至1760萬元，相當罕見。市傳佢阿媽百利保（617）又要再融資，當然要有啲表現至可以爭取銀行家信任。