上周五，張柏芝為替《慈善星輝仁濟夜》籌款，奉獻出她的第一次——高台飛車表演。不幸地，當車輛降落時發生了意外，導致她的第十二節胸椎骨受傷，情況嚴重的話，將有可能影響日後活動能力。
但據一名從事特技人工作十多年的Sam所講，原來只需要一條橡筋，柏芝的這個悲劇便不會發生。而這種外國慣用飛車特技安全措施，早在95年拍攝電影《霹靂火》時已經使用。 記者：朱文俊 部分攝影：林栢鈞
找來從事特技人工作十多年，先後跟成龍及董瑋合作，本身更是劉德華御用替身的Sam分析事故，發現意外最少犯了以下三個錯處：
1土法煉鋼：經驗不足兼過時
無綫每年舉辦台慶或慈善籌款活動，所有高難度演出，均是外判予其他特技人公司。為保持新意，通常每年或兩年更換一批特技人公司，雙方因合作時間太短而默契不足。今年接手的特技人雖是在行頭頗出名的Roger，但問題在於發展集中在香港本地，而香港過往特技拍攝包括飛車、爆破等，均是小規模偷拍，很多特技人自行摸索一套認為可行方法，並無接受任何正統訓練，使用方法會過時，安全程度或未能追及現今水平。
救命橡筋原理
Sam有份參與成龍主演電影《霹靂火》特技工作，他認為安全措施應可加多一點：「飛車表演最緊要係架車喺落地一剎那，車輛可唔可以盡量做到四轆着地，等架車可以平均分擔嗰股衝力，然後就係點樣令個車手，減少『硬食』着地時衝力。例如架車係由車頭先接觸地面，嗰股衝力非常之大，當避震去到盡都唔能夠卸去嗰股衝力時候，股衝力便會反彈上嚟，但當時車手嘅身體因為衝力關係，仍然向下墜，兩股力相交，車手便會食晒，今次柏芝嘅意外，好大程度上亦係咁樣發生。
救命橡筋保安全
外國飛車表演，特技人都在腰部位置綁上一條橡筋，另一頭固定在車頂位置，等架車着地一剎那，車頭向下衝嘅時候，橡筋因為固定在車頂，便會將車手微微向上抽離座椅，減低衝力，唔會由車手食晒，減少受傷機會，成龍95年拍《霹靂火》同《我是誰》都有用呢個方法。」
2心理準備不足：出事唔識做反應
Sam表示：「作為特技人帶領一個新人時，一定要喺事前畀足心理準備表演者，問佢一啲接住會發生問題，例如，你知唔知架車衝落地嘅感覺係點？如果對方可以清楚答到的話，先可以畀佢繼續表演，相反對方回答時有疑惑或者完全唔知點反應，就要中止表演，用其他方法令佢明白嗰種感受！」
3準備工夫疏漏：女仔表演唔着數
無論幾專業特技人，事前準備工夫一定要做足，何況是嬌滴滴的張柏芝？Sam說：「今次意外另外一個疏忽，我會認為係無諗過表演者係女仔，因為一般來說女仔肌肉同骨骼都較男仔稍弱，原因係同玩嘅運動類別有關，好多女仔一世人有好多組肌肉都冇乜點操練，突然間要承受撞車咁大衝力，唔係好多人可以接受到，所以如果由我負責今次柏芝飛車表演項目，我會將車內司機座椅換成貨櫃車常用的油壓椅，等架車衝落地時，車手唔使咁傷。」
為慈善曾作多次危險表演的楊盼盼，亦認為柏芝心理準備不足：「其實以我二十年高難度表演經驗來講，每次接受挑戰前，都要檢討一下，問自己可唔可以承擔到後果，因為當你上到去埋位時候，就冇人可以幫到你，唯一可以依靠就係之前多啲練習，我睇報紙話佢之前冇試過飛台，咁樣其實唔係咁好，因為有啲感覺，例如着地嗰吓衝力，唔親身去感受一次，好難憑空去了解係件乜嘢事，加上一次過飛咁遠距離，作為新人來講，未必可以適應，最好係飛過兩架車，然後三、四、五架加上去，就比較穩陣。不過今次事件始終係意外，柏芝都從中得到經驗，其實好似佢咁好前途，唔應該做啲咁危險嘅嘢，應該拍多啲好戲，呢啲表演留番畀其他人做。總括嚟講，今次表演係成功嘅，大家將焦點放在意外，對佢都唔係好公平。」盼盼更謂，希望勿因今次發生不愉快事件，以後不再為公益籌款。只要做足安全措施，高危表演都可以好安全。
人有時會受到經驗與視覺欺騙，以為某種行為非常危險，當真相揭穿後，你便會發覺得啖笑。例如以前吳剛嘅飲滾油，最近康華心口碎大石等，在特技人眼中只不過係技巧運用，結果都係得啖笑！在他們眼中，如高台飛車、空中飛人才屬高危！