讀者David問：
本人早前買咗部二手車，但頭燈嘅白光燈膽最近突然燒掉，請問更換時有何注意地方？另外又係咪可以自行將之更換呢？
David：
一般市面上嘅白光燈膽，其實係喺燈膽表面塗上一層藍色嘅物料，從而將黃光化成白光；不過呢種藍色嘅色調相當深，而燈膽嘅光線往往被減低三分之一至一半；所以有啲燈膽係會將燈膽嘅Watt數加大，因而令燈膽嘅壽命變短。而一般私家車所用嘅燈膽，大概分為H1、H3、H4、H7及HB4。其中，一般歐洲私家車大燈係H1，霧燈就係H7，而日本私家車多數用高低燈集於一身嘅H4；不過水貨車嘅車主要留意，皆因有部分水貨車，會採用與抵港車款不同嘅燈膽類別，所以買燈膽時最好先將原裝燈膽拆下，然後再拿去商舖對住嚟買，咁就最穩陣喇。
而拆下燈膽嘅過程亦非常簡單，只需打開車頭冚，開啟燈座背後嘅防水蓋，然後拔出電線便可將燈膽拿出來；而要注意嘅地方，就係唔好用手碰到燈膽嘅玻璃，因為手上嘅油脂會令燈膽表面過熱，好容易就會令燈膽破裂㗎喇。
如果大家對汽車有任何問題，可傳真或來信畀我哋，我哋會盡快為你解答。
傳真：27420542
郵寄：香港將軍澳工業邨西駿盈街八號《蘋果日報》副刊「車天車地」版「汽車Q&A」收。