自從葉靜子同財爺梁錦松傳出緋聞，又喺香港搞個「擁抱吉祥」文物展搞得有聲有色之後，佢一時間成為紅人。原本佢打算喺香港做完展覽之後就移師去深圳繼續再做，點知最近聽講靜子放棄喺深圳博物館做展覽，改為喺廣州舉行。
原因係因為有人見靜子喺香港搞得有聲有色，就即刻同佢喺深圳爭嚟做，有消息話早排搞到有人喺深圳博物館放置炸彈搞事。馮仁昭即刻打電話畀靜子了解情況，靜子都承認有呢件事，佢話之前去完日本旅行返嚟，就收到有人喺博物館放置炸彈呢個消息，佢重話幸好爆咗嗰兩個炸彈威力好弱，所以無損佢暫放喺館內嘅珍貴文物。葉靜子重講深圳一站因為出咗一啲問題，所以取消唔做，改為喺廣州，佢希望可以盡快喺今個月底舉行。
早排呂良偉同班女藝人，有翁虹、張文慈同張玉珊等，喺上海為一個樓盤開售做宣傳，個個女星都打扮得鬼火咁靚，但號召力居然統統都輸晒畀憑電視劇《上海灘》演丁力成名嘅阿呂，班上海人一見阿呂就好似蜜蜂「嬲」蜜糖咁，圍住佢狂叫：「偉哥，偉哥！」阿呂聽到班上海人咁叫佢不知幾自豪。不過班香港記者一聽到就即刻忍唔住笑。偉哥喎，你話啲記者會諗咩吖！
有報道話阿姨仔姐蔡雪芬用咗成千萬，就係為咗應酬啲圈中靚仔，當中包括曾經都喺無綫紅過吓嘅張兆輝。記者噚日見到張兆輝，就順便問吓佢有冇份分享嗰千萬，點知佢嘅答案真係令人好鬼失望，佢竟然話飯就有食過十次八次，最可惜就係鮑參翅肚都冇。張兆輝對姨仔姐嘅印象非常好，成日讚佢人好nice，重有最令佢印象難忘係姨仔姐平時戴嘅表，啲黃金鑽石多到見唔到支分針。
早排吳綺莉帶埋個女，同埋阿媽走去上海，重咁啱俾傳媒影到，又話佢同家人要搬去上海住。馮仁昭雖然諗到頭爆，都唔明吳綺莉做乜失驚無神要走去上海，但就知道近日身在上海嘅，重有佢個女個老竇成龍嘅正室，即係林鳳嬌，聽講阿嬌最近帶埋阿仔祖明去咗上海住。唔知係咪兩個女人心有靈犀呢？
喺湖南演出俾人淋屎兼推落地嘅趙薇，早排佢喺上海拍《天下無雙》時已經因為呢件事搞到無晒心機，點知重要喺佢呢個時候同個舊情敵，即係早排同佢個富貴舊男友葉茂菁拍拖嘅李婷宜冤家路窄，齊齊喺上海勝強片場拍戲，重住埋同一間酒店。至於趙薇有冇同李婷宜撞到正就唔知，但馮仁昭就知道，趙薇愁眉苦臉，李婷宜就春風滿臉。